抗癌勇士丨文頌男做電療嗎啡已不能完全止痛　Koba用積極態度答謝支持者

曾任J2台主持文頌男（Koba）在去年10月確診患上罕見癌症「尤文氏肉瘤」（Ewing’s  Sarcoma），之後全面停工及積極接受治療，惟病情反覆，曾因劇痛令他要跪住坐。而Koba因病停工零收入加上醫療費用昂貴，早前公開籌募醫藥費。

在昨日（5月6日）Koba在友人陪同下，現身新城廣播接受《QK 玉瑛室》節目主持譚玉瑛、何基佑及麥皓兒訪問。戴住鴨舌帽及口罩的Koba撐住拐扙現身，全程表現樂觀及笑容滿臉，以樂觀態度迎戰癌魔，充滿鬥志。

抗癌勇士丨文頌男冇覆網民私訊被鬧　Koba：希望可以畀多啲空間我

▲ 文頌男接受譚玉瑛、何基佑、麥皓兒訪問。

文頌男單親家庭成長

Koba在節目中表示，當得知自己患癌時沒甚麼特別感覺，反而十分冷靜，稱：「因為未反應得切，返到屋企沉殿咗幾日，先愈嚟愈擔心同焦慮，又要諗點樣同公司、家人、朋友點樣交待。」

現年28歲的Koba於單親家庭成長，因為在他12歲時，父親有外遇離家，家庭頓失經濟支柱，更欠下很多債務。

Koba透露，自己的童年過得十分反叛，經常逃學及不歸家流連街上，稱：「渾渾噩噩過咗一年，突然醒覺唔可以再無所事事同生產力，當時只做外賣收入好少，覺得人生唔可以再係咁，跟住返咗學校讀書，直至大學畢業。」

▼點擊圖片放大

+6

+5

Koba樂觀態度對抗癌魔

可是，不幸地，Koba加盟J2台擔任主持1年便發現有惡性腫瘤，但仍堅持到行動不便才停工，說：「因為真係好鍾意返工，唔想浪費每一次出鏡。」

惟面對龐大醫療費和生活支援，Koba日前在IG公開籌務醫藥費，稱：「剩係覆診做電療可能只係幾十或幾百元，最貴係照Ｘ光，因為公立醫院要等半年先有報告，去私家照要萬幾至二萬，仲要局部照，呢個係最大負擔，依家短期內要幾十萬先夠我維持幾個月嘅醫療費用。」譚玉瑛作出呼籲：「希望大家聽到之後，可以畀頌男多啲支持，令佢可以繼續做自己鍾意做嘅嘢。」

可是Koba完成5次化療後卻未見好轉，形容當時心情像跌入深淵，說：「做化療好辛苦，自己變得好虛弱，好似徘徊生死邊緣，又甩晒頭髮，冇以前咁好睇，覺得做咁嘢都冇用嘅，我仲醫唔醫得好呢？我仲近死亡近咗一步，成個情緒好崩潰。

不過他表示：「但我都好快收拾到，過咗幾日就已經唔再諗呢樣嘢，係咁提醒自己至少仲可以見吓朋友，仲可以開心到，唔好諗自己過得幾咁困難。」

▲ 文頌男完成5次化療卻未見好轉。

嗎啡不能完全止痛

Koba由開始治療至今近9個月，現時正在做第17次電療，而總共要做28次，稱：「最辛苦係平躺做電療會好痛，第一次做電療時痛到呻吟，要用意志力忍住，做完副眼鏡濕晒，隻腳好似冇咗感覺，成個人震得好緊要，落床後跪喺出面十幾分先平復到。」

現階段，Koba要靠吃止痛藥和嗎啡止痛，但嗎啡的份量不但愈來愈多，而且並不能完全止痛，令他相當辛苦。不過Koba依然正能量滿滿，並答謝一直支持他的人，稱：「感謝大眾可能唔認識我，但都好熱心傳訊息鼓勵同捐款，好多謝你哋。」

最新影片推介：

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5